Act 11 | KMG | STEP | Aposolo gâcne â opâ ruac Judaia mâreŋko jumbiŋ, jaŋe qâpuczi wâc Anuture dâŋ ro maŋ embiŋ irec biŋe manambiŋ.

Acts 11

Jerusalem haeonec opâ ruaczi Petoro mu tutuc ecnembiŋ

1 Aposolo gâcne â opâ ruac Judaia mâreŋko jumbiŋ, jaŋe qâpuczi wâc Anuture dâŋ ro maŋ embiŋ irec biŋe manambiŋ. 2 Irec Petorozi Jerusalem haeo risie feme Judaŋiczi opâ ruac jaŋe manacnepie mi sâckeme 3 šiŋuc âzâcnembiŋ: “Go wemocte Mosere ma tâmiric iqic-joparâ jaŋere meonec wiac nâmeŋ?” 4 Eme Petorozi wiac fuawec i fuŋnaonecteaŋ qâwirickerâ šiŋuc jazawec: 5 “No Jope haeo numuhuc juhape Wofuŋzi maŋko fuac enareme wiac kecšiŋuc honepo: Wiac moc racsâko tinac tofane 4 ira basanaŋkehuc sambâŋkonec âkesuepie wahaku maŋfuŋ-naneo fisiwec. 6 Wahame findendeŋnehuc hone qârâwiŋ ejarehuc honepo: Maŋnao qowi kosa, micmâŋ â micnehec, erâ homa wiac â sawa wipe fowec. 7 Ehame norao dâŋ wiwira kecšiŋuc fuawec: `Ajoc Petoro, go hezu nâc ec. Ž 8 Eme noni mupo, `Wofuŋ, misac, no wiac hecke-nârekicne â mamakâcne moc mi nâekopac. Ž 9 Iŋuc mupe sambâŋkonec dâŋ harierâ šiŋuc fuawec: `Anutuzi wiac mušurekac i goki mi surec. Ž 10 Wiac iŋuc fuame jahec â moc eme racticnehec fârepie sambâŋko risie fewec. 11 Eme manaŋgopieŋ, wiac i arictac ehame izia Kaisarea haeonec ŋic jahec â moc nore kiŋaŋ fârâ fic jumbeŋ ira fisimbiŋ. 12 Fisipie Mârozi šiŋuc nazawec: `Go jaŋehec racmurâ maŋbahac mi ec. Ž Eme rape opâ ruac ŋic 6 kecši jaŋe bâjâpecnumbiŋ. Ra fisirâ momori soŋaŋte ficko fepene 13 dâŋ binaŋ kecšiŋuc enârewec: `Nore ficko aŋelozi wefu fua-narerâ šiŋuc nazawec: Go Jope haeo kiŋaŋ sorec-jopatec Simoŋ, šâŋene moc Petoro, jowa warepie 14 dâŋ mume go â wiacfâcge ŋoŋe manarâ biaŋke-fârenšepieŋ. Ž 15 Eme no miti jazahape mârâc nâŋâcnao Tiri Mâro wahawec iŋuc jaha jaŋerao wahawec. 16 Eme no i honerâ Wofuŋzi dâŋ kecšiŋuc muwec i manasupo: `Johanezi opâ rua-ŋarewec, ŋoŋe ine Tiri Mâro rua-ŋarezo. Ž 17 Eme nâŋâc Wofuŋ Jesu Kristo manasiŋkehapene wiac tahacke-nârewec, ijaha jaŋe tahacke-jareme no iŋucnezi wemocko Anutu qataracnezapo.” 18 Iŋuc muhuc jazame jaŋe manarâ maŋjeŋic fâre wahame Anutu muteŋkehuc šiŋuc mumbiŋ: “Opo, Anutu e ŋic qâpuc maŋjeŋic bârisierâ juju sanaŋte biŋe eniŋte wâc mujarekac hâcne.”

Antiokia haeo miti fuawec

19 Stefano qarâ opâ ruac gâcne jopa bâtâtiec ejarepie haha rârâwiŋ qarâ tucnezi Foinike â Kipiro nucko â Antiokia haeo rambiŋ. Ra juhuc miti i Judaŋic sawa jazambiŋ. 20 Eme ŋondeŋ-jeŋicko Kipiro nuckonec â Kirene mâreŋkonec opâ ruac ŋic jumbiŋ, jaŋe Antiokia haeo fisirâ Grikŋic jaŋehec iŋuc jaha muc manac ehuc Wofuŋ Jesure Biŋebiaŋ jazambiŋ. 21 Eme Wofuŋzi tâpiri sicne-jarehame jazapie ŋic guru sâko jaŋe manarâ maŋjeŋic bârisierâ Wofuŋte biŋe embiŋ. 22 Eme irec dâŋ Jerusalem kikefuŋ jaŋerao rame manarâ Banaba sorepie Antiokia haeo rawec. 23 Ra fisirâ Anutu uruc jauŋ-ticne honerâ bubiaŋ manarâ maŋjeŋiczi Wofuŋtao herâŋke sanaŋkeniŋte faŋ qajarewec. 24 Banaba e ŋic biaŋne, maŋnao Tiri Mâro â mamanasiŋ fusewec. Eme hae ira ŋic wemo afecnezi Wofuŋtao šuhuckembiŋ. 25 Eme Banaba e Saulo bâfuaocte Taso haeo rawec. 26 Ra bâfuarâ jowame Antiokia haeo warepic. Erâ opâ ruac guruo jara moc juhuc ŋic bocjaha miti jaza qazuc epic. Antiokia hae ira hâcne ŋiczi Jesure kikefuŋ jaŋere šâŋe Kristoŋic mufuambiŋ.

Judaia mâreŋko opâ ruac jaŋerao moneŋ râepie rawec

27 Dameŋ ira porofete ŋic Jerusalem haeonec Antiokia haeo rambiŋ. 28 Ehuc jaŋeraonec moc, šâŋene Agabo, e Mârozi ecneme mâreŋ sâc roroc sâko fuaocte irec findaŋdâŋ muwec. Eme roroc i ŋicwofuŋ sâko Klaudio juhame fuawec. 29 Eme opâ ruac jaŋe dâŋ i manarâ moneŋ fojarewec sâc bâturerâ Judaia mâreŋko âgofâc-jeŋic jaŋerao râepie raocte mupaŋkembiŋ. 30 Erâ moneŋ bâfuambiŋ i Banaba â Saulo jactepie bara opâ ruac soŋaŋ micnefâc-jeŋic jarepic.